Norðurá fór í 173 rúmmetra í úrhellinu í nótt

Slagveðrið sem gekk yfir landið í nótt hafði því miður hrikalega leiðinlegar afleiðingar fyrir þá sem voru mættir til að veiða í Norðurá.

Það fór ekkert framhjá neinum veðrið sem gekk yfir landið í gær og í nótt með þeim afleiðingum að árnar á Vesturlandi fóru flestar í flóð. Það kemur ekki að sök í þeim ám sem ekki hafa opnað fyrir veiðimenn en í Norðurá var staðan ekki góð. Áin opnaði með fínni opnun en fyrsta holl var með hátt í 30 laxa og sáu nokkuð líf í ánni sem setti þess vegna, alveg eðlilega, væntingarstuðulinn í botn hjá þeim sem áttu daga í ánni á eftir þeim. Staðan var hins vegar sú eftir úrhelli næturinnar að Norðurá var komin í 173 rúmmetra af vatni en ætti í venjulegu árferði að vera milli 30-40, þó það sé misjanft milli ára.

Áin er sem sagt í flóði sem gerir hana eiginlega óveiðandi. Hilmar Hansson í Veiðiflugum er einn þeirra sem er við bakka Norðurár og hann sagði stöðuna ekki góða enda áin óveiðanleg í þessu vatni. Veiðifélagi hans fór þó út í morgun og fékk eina töku en það var allt og sumt. Það er ekki beint spáð spennandi veðri næstu daga en þó engu sambærilegu úrhelli og í nótt svo áin á eftir að hreinsa sig og sjatna.  Á meðan gengur laxinn í hana óáreittur sem boðar gott fyrir þá sem eiga daga í henni þegar hún gengur niður en í þessum skilyrðum getur takan orðið mjög góð.