Audi Prologue Allroad

Audi hefur sýnt Prologue tilraunabíl sinn undanfarið á bílasýningum og hefur hann vakið þar eftirtekt fyrir fegurð. Nú hefur Audi tekið Prologue bílinn á næsta stig og komið fram með Allroad útfærslu hans, en Audi ætlar að sýna þennan bíl á bílasýningunni í Shanghai sem hefst 20. apríl.

Ef Prologue tilraunabíllinn var flottur áður er hann enn flottari í þessari útfærslu og sannarlega kraftalegri. Talandi um kraft þá er nóg af honum undir húddinu. Bíllinn fær 4,0 lítra V8 vél auk rafmótora og samanlagt skilar þessi drifrás 734 öskrandi hestöflum sem henda bílnum í hundraðið á 3,5 sekúndum. Ekki slæmt fyrir torfæruhæfan bíl.

Þessar tölur eru samt ekki það merkilegasta við bílinn, heldur öllu fremur að uppgefin eyðsla hans er 2,5 lítrar, en fyrstu 55 kílómetrana getur hann ekið eingöngu á rafmagni. Hlaða má rafhlöður bílsins þráðlaust. Mælaborð Prologue bílsins hefur vakið athygli fyrir það að vera nánast takkalaust og því er innréttingin nokkuð naumhyggjuleg, en hrikalega töff. Vonandi fer þessi bíll í framleiðslu, en hann verður ekki ódýr.