Fær 33 milljón króna sekt fyrir að flytja inn bíl

Í Bandaríkjunum er einkar undarleg löggjöf í gildi er kemur að innflutningi á erlendum bílum til landsins. Stranglega bannað er að flytja inn bíla sem ekki eru ætlaðir fyrir hinn bandaríska markað og hafa ekki verið samþykktir af yfirvöldum vegna öryggis- og mengunarmála.

Einn íbúi Mississippi fylkis fékk heldur betur að kenna á þessum ströngu viðurlögum. Ekki er nóg með að hann hafi fengið 250.000 dollara sekt þá fær hann allt að 20 ára fangelsisdóm. Það þætti mörgum ansi strangur dómur fyrir að flytja inn bíl ólöglega.

Bíllinn sem freistaði mannsins svo mikið er Nissan Silvia sem sést hér á mynd og þykir góður akstursbíll. Þessir bílar voru framleiddir á árunum 1974 til 2002 og eiga margt sameiginlegt með Nissan 240SX, sem einnig naut mikilla vinsælda sem sportbíll.