Nýr Audi R8 í Genf

Bílaframleiðendur heimsins keppast nú við að lauma að umheiminum hvað þau ætla að sýna af nýrri framleiðslu sinni á komandi bílasýningu í Genf í byrjun næsta mánaðar.

Audi er þar enginn eftirbátur og ætlar meðal annars að sýna nýja kynslóð sportbílsins Audi R8, bíls sem mærður hefur verið mjög síðan hann var fyrst kynntur árið 2006. Á myndinni hér að ofan sést ný gerð bílsins.

Helstu sjáanlegu breytingar á bílnum eru þær að álhliðarplatan aftarlega á hlið bílsins er horfin, en hún hefur einkennt hann öðru fremur. Einnig er framendi bílsins mikið breyttur og nú orðinn meira í ætt við aðra bíla Audi.

Búast má við því að nýi bíllinn verði vopnaður enn meira afli en áður. Það ættu að verða stórar tölur í ljósi þess að núverandi R8 býðst með 430 hestafla V8 vél, 550 hestafla V10 vél og enn öflugri gerð hennar, 550 hestafla V10 Plus.