Hljómsveitin UMTBS syngur sitt síðasta

„Okkur þykir þetta vera komið gott í bili og er þetta því síðasta giggið okkar í óákveðinn tíma,“ segir Sigurður Ásgeir Árnason söngvari hljómsveitarinnar Ultra Mega Technobandsins Stefáns (UMTBS) en sveitin kemur fram á sínum síðustu tónleikum um óákveðinn tíma á Mýrarbolta-hátíðinni á Ísafirði um helgina. UMTBS eins nafn sveitarinnar er að jafnaði skammstafað, hefur verið starfandi frá árinu 2006 og hefur verið talin ein hressasta tónleikasveit landsins.

„Það er engin sérstök ástæða fyrir því að við erum að hætta, menn vilja bara fara gera eitthvað annað,“ segir Sigurður. Hann var sjálfur að ljúka mastersnámi í hagnýtri menningarmiðlun. „Mig langar að taka pásu frá tónlistinni og vil prófa eitthvað nýtt.“ Þá eru fleiri meðlimir sveitarinnar einnig að mennta sig og hefur það einnig áhrif. „Jón gítarleikari er að til Svíþjóðar í nám,“ bætir Sigurður við.

Lokatónleikar sveitarinnar fara fram á laugardagskvöldið á Ísafirði og lofa þeir félagar flottum tónleikum, enda sveitin þekkt fyrir að vera frábært tónleikaband. „Við vildum ekki hafa einhverja sérstaka lokatónleika en við leggjum alltaf mikið í tónleika okkar. Þetta verður mjög skemmtilegt, sérstaklega vegna þess að við erum að spila með svo frábærum tónlistarmönnum eins og Agent Fresco og Emmsjé Gauta svo einhverjar séu nefndir. Það er gaman að enda þetta á svona nótum,“ segir Sigurður.

Fyrr á árinu gerði hljómsveitin samning við norska kynningarfyrirtækið Indianer en það annast kynningarmál fyrir listamenn sem eru á tónleikaferðalagi um Noreg. Arctic Monkeys, Adele, Prodigy og Franz Ferdinand eru á meðal þeirra risanafna í tónlistarheiminum sem fyrirtækið hefur unnið með. „Við höfum spilað mikið erlendis og þurfum ekki að fara meira út. Það er ekki alltaf nóg fyrir hljómsveitir að fá samning, það er alltaf mikil vinna sem fylgir.“

Sveitin skilur eftir sig tvær breiðskífur, Circus og !.

UMTBS í aldanna rás

UMTBS sem var stofnuð 2006 hefur að undanförnu skipt um stíl og hafa tveir nýir meðlimir bæst við hópinn undanfarin ár, þeir Vignir Rafn Hilmarsson á hljómborð og Jón Helgi Hólmgeirsson á gítar. Fyrir voru í sveitinni ásamt Sigurði þeir Arnþór Jóhann Jónsson hljómborðsleikari, Arnar Freyr Gunnsteinsson bassaleikari og Guðni Dagur Guðnason trommuleikari.

Hljómsveitin lenti í 2. sæti á Músíktilraunum 2006, en undanúrslitakvöldið var fyrsta skiptið sem þeir spiluðu á tónleikum.

Árið 2007 fer sveitin í ýmis tónleikaferðalög og kemur meðal annars fram á hátíðum By:Larm í Noregi, G! Festival í Færeyjum og víðar.

Hljómsveitin gaf út fyrstu plötu sína árið 2008, Circus en lag þeirra, Story Of A Star, var mikið spilað í útvarpi og seldist vel á vefnum Tonlist.is. Sveitin gaf síðast út plötuna, ! árið 2013.