Styrkja vin sinn í kvöld

Kristinn Arinbjörn Guðmundsson lenti í þeirri hræðilegu lífsreynslu fyrir stuttu að fá heilablóðfall í kjölfar flókinnar heilaskurðaðgerðar. Hann er nú lamaður öðrum megin í líkamanum eftir heilablóðfallið og hafa því vinir hans ákveðið að efna til styrktartónleika á Gauknum í kvöld, til að létta undir með Kristni, Helgu Gunnarsdóttur konu hans og Kristjönu Bellu dóttur þeirra í þessum erfiðleikum. Áður hafði hann lengi átt við mjög erfið veikindi að stríða.

Á tónleikunum í kvöld koma fram hljómsveitirnar Morðingjarnir, Strigaskór nr. 42, For a Minor Reflection, Smári Tarfur, LITH og Pandemic Addiction.

Miðaverð á tónleikana er 1.000 krónur og mun allur ágóði af tónleikunum renna beint til Kristins og fjölskyldu hans.

Einnig verða til sölu diskar með hljómsveitinni KAbear, en þar syngur Kristinn og semur hann einnig öll lögin. Plata hans er einnig fáanleg á gogoyoko.

Tónleikarnir hefjast klukkan 21.00 og eru eins og fyrr segir á Gauknum.