„Gáfum aldrei út dánartilkynningu“

„Við hættum aldrei formlega og gáfum aldrei út dánartilkynningu,“ segir Birgir Örn Steinarsson, söngvari og gítarleikari hljómsveitarinnar Maus, en sveitin hefur staðfest komu sína á þrjár tónleikahátíðir í ár, Aldrei fór ég suður, Eistnaflug og Secret Solstice.

Maus fór á ís árið 2004 og síðan þá hefur lítið til hennar spurst. „Síðustu tónleikarnir voru í nóvember 2004 á Húsavík og fórum við allir hver í sína áttina þá. Ég fór til London og var þar í 3 ár og vann meðal annars plötu þar. Palli gítarleikari fór til Eistlands að klára doktor í klassískum tónsmíðum, Danni trommuleikari fór til Barcelona að læra grafíska hönnun og Eggert bassaleikari fór svo til San Francisco að vinna fyrir íslenskt tölvufyrirtæki,“ segir Birgir Örn um upplausnina.

Meðlimirnir ákváðu þó að telja í æfingu um leið og allir væru komnir til Íslands. „Við vorum allir komnir heim í ágústmánuði og töldum í fyrstu æfingu fljótlega eftir það en okkur grunaði ekki að það myndi líða svona langur tími.“

Menn voru misryðgaðir á hljóðfærin þegar í fyrsta lag var talið. „Eggert hafði ekki snert bassann en það kom ekki að sök, hann var alveg með þetta. Það gekk bara mjög vel þó svo að maður kunni ekki öll lögin strax.“ Það er þó enn óráðið hvort sveitin gefur út plötu á ný. „Við ætlum að vera virkir í ár en höfum ekki tekið ákvörðun varðandi nýtt efni.“