Elta rokkstjörnudrauminn erlendis

„Við erum að flytja til Sønderborg í Danmörku í næsta mánuði. Þetta er miðsvæðis og það er stutt í allt,“ segir Óskar Logi Ágústsson, gítarleikari og söngvari hljómsveitarinnar Vintage Caravan, en sveitin ætlar að flytja til Danmerkur til elta rokkstjörnudrauminn.

Ástæða flutninganna er sú að sveitin vill vera nær meginlandi Evrópu vegna þess að möguleikarnir eru töluvert fleiri úti en á Íslandi. „Það er bara fjögurra tíma akstur til Hollands og líka stutt til Þýskalands og svona. Við erum allir barnlausir og því kjörið að láta verða af þessu núna,“ bætir Óskar við.

Það getur verið dýrt að fara út í tónleikaferðlag og því aðgengilegra að ferðast þegar á meginlandið er komið. „Þetta er fyrsta tónleikaferðalagið sem við förum í og við erum að hita upp fyrir þrjú önnur bönd. Þetta er frábært tækifæri og verður geggjuð kynning. Túrinn hefur verið auglýstur víða,“ útskýrir Óskar.

Búferlaflutningar sveitarinnar eru þó ekki það eina sem er í gangi hjá þeim félögum. „Við gerðum útgáfusamning við Nuclearblast í Þýskalandi, sem er stærsta þungarokksútgáfufyrirtæki í heimi og nú er platan okkar, Voyage, komin út í Bandaríkjunum og í Evrópu,“ útskýrir Óskar. Platan hefur fengið frábærar viðtökur og gaf til að mynda hið virta þungarokkstímarit Kerrang! plötunni fjórar stjörnur af fimm mögulegum. „Kerrang! sendi meira að segja ljósmyndara til landsins og við fengum heilsíðu í tímaritinu.“

Sveitin hefur einnig gert samning við bókunarfyrirtækið Rock The Nation sem hefur skipulagt þriggja vikna tónleikaferðalag fyrir sveitina og hefst hún um miðjan marsmánuð og farið verður um Evrópu. „Við förum til Bretlands, Írlands, Frakklands, Sviss, Austurríkis, og Hollands.“ Sveitin spilaði einnig á Eurosonic-hátíðinni í Hollandi fyrir skömmu. Hljómsveitin er bókuð á eina stærstu þungarokkshátíð í heimi, Wacken Open Air, sem er 90.000 manna hátíð sem haldin er í Þýskalandi í sumar.

Í tilefni flutninganna til Danmerkur ætlar sveitin að halda veglegt kveðjupartí á Gauknum þann 7. mars og kostar 1.500 krónur inn. „Við ætlum að kveðja landann vel, þetta verður mikil veisla.“ Hljómsveitin ONI sér um upphitun en tónleikarnir hefjast klukkan 22.00.