Kron Kron-verslun og hestaleikhús

Hugrún Árnadóttir og Magni Þorsteinsson með nýja verslun á Suðarlandi í Fákaseli en þar er einnig hestaleikhús.

Þar sem Ingólfshvoll stóð áður, milli Hveragerðis og Selfossar , hefur Fákasel opnað dyrnar í allri sinni dýrð. Staðurinn býður upp hestaleikhús með 800 manna sal, veitingastað sem er samtengdur reiðhöllinni í Ölfusi og nýja Kron Korn verslun þrátt fyrir að eigendurnir séu hvorugt í hestabransanum.

„Við komum sjálfum okkur algjörlega á óvart að fara út í þennan bransa. Fákaselsævintýrið fór í gang fyrir ári og okkur var boðið að fara í samstarf og fannst þetta strax sjúklega spennandi,“ segir Hugrún Árnadóttir, eigandi Kron Kron.

„Við opnuðum Kron Kron með áherslu á sveitahliðina á okkar eigin vörum og höldum áfram að vera sögumenn og kynna íslenska hönnuði. Við erum með þessu móti að huga betur að landsbyggðinni, fólki sem á leið hjá og að sjálfsögðu ferðamönnum,“ bætir hún við.

Hugrún segir fleiri spennandi verkefni vera framundan en þá ber einna helst að nefna verkefnið sem ber nafnið, Amma mín. „Við höfum verið að grafa upp ýmsar handverkskonur um land allt sem eru ömmur eða langar að vera ömmur einn daginn og segja sögu þeirra. Þannig geta þær einbeitt sér að vinnunni og við sjáum um kynningu á þeirra handbragði undir þeirra formerkjum. Þetta er góður vettvangur fyrir íslenska hönnun og við fáum stöðugt inn nýja hluti í verslunina.“