Íslenskt óveður lék Land Rover leiðangur grátt

Á annað hundrað Land Rover Discovery Sport bílar eru staddir hér á landi vegna kynningar á þessari nýju bílgerð frá Land Rover. Vísir greindi frá því í síðustu viku en verðmæti þeirra samanlagt er talið um hálfur milljarður króna.

Er þeim ekið af bílablaðamönnum frá öllum heimshornum á fáförnum vegum hérlendis. Verður það gert í meira en í mánuð samfellt og nýir og nýir blaðamenn koma og reyna á jeppana þar sem mætir þeim óblíð náttúra og varasöm veður.

Greinilega er ekki nóg að vera á góðum jeppum frá Land Rover þegar náttúruöflin byrsta sig eins og undanfarið hér á landi. Í einni ferð blaðamannanna gerði svo snælduvitlaust veður að skilja varð einn þeirra eftir og þurfti stórvirka vinnuvél til að moka aðra bíla leiðangursins út.

Mjög skemmtilega frásögn írsk blaðamannsins Michael McAleer má sjá hér. Greinilegt er að honum fannst nóg um það veður sem leiðangursmenn glímdu við á ferð sinni hér. Velti hann meðal annars fyrir sér hvort ekki væri best að skilja umræddan jeppa eftir í snjónum svo næstu kynslóðir átti sig á því að jafnvel flottustu jepparnir geti þurft að játa sig sigraða í baráttu við veður og vinda.

Hætt er við því að fleiri blaðamenn lendi í ævintýrum ef náttúran heldur áfram byrsta sig næstu vikurnar á landinu.