Datsun Go fékk 0 stjörnur í árekstrarprófi

Bílaframleiðendur keppast að því að ná 5 stjörnum í NCAP árekstrarprófum. Margar bílgerðir hafa náð því og flestir aðrir fá 4 stjörnur. Til er þó nýr bíll sem nýverið fékk ekki eina einustu stjörnu í slíku prófi og það er Datson Go sem Nissan framleiðir fyrir markassvæði þar sem bílar verða að vera ódýrir,  til dæmis í Indlandi.

Datsun Go er afar ódýr bíll og kostar ekki nema 850.000 krónur þar. Er það gott og blessað, en verra er að fá umsögn eins og NCAP lét hafa eftir sér eftir árekstarprófun á bílnum. „Mjög miklar líkur eru á lífshættulegum meiðslum í árekstri á Datsun Go“.  

Það eru aðallega 3 atriði sem gera bílinn svona hættulegan að mati NCAP. Bíllinn er ekki búinn ABS-bremsum og því er stöðvunarvegalengd hans afar löng. Hann er ekki með neina öryggispúða sem vernda ökumenn  eða farþega í árekstri. Þriðja atriðið og það alhættulegasta er að bíllinn er þannig smíðaður að hann krumpast saman eins og sardínudós í árekstri og því hefðu öryggispúðar líklega enga þýðingu hvort sem er.

Forstjóri NCAP hefur sagt að best væri að taka bílinn úr sölu, svo hættulegur sé hann. Nýjustu tölur um dauðsföll í umferðinni í Indlandi eru frá árinu 2011 og það ár dóu 250.000 manns. Þar eru ekki gerðar miklar kröfur til bíla, mannslíf ef til vill ekki mikið metin og hver sinnar gæfu smiður. Forstjóri NCAP telur engu að síður litla ástæðu til að auka enn á þá hættu sem að ökumönnum stafar þar með sölu á þessum bíl.