Harleyinn hans Peter Fonda úr Easy Rider til sölu

Fá mótorhjól eru frægari en þessi Harley Davidson úr kvikmyndinni Easy Rider frá árinu 1969. Það var Peter Fonda sem ók um á þessum fák, en aðrir þekktir leikarar í þessari mynd voru Dennis Hopper og Jack Nicholson.

Hjólið fræga verður boðið upp í Kaliforníu á næstunni og búist er við því að 1,2 milljónir dollara fáist fyrir það, eða hátt í 150 milljónir króna. Útliti hjólsins er að mestu frá Peter Fonda sjálfum komið, hann vildi hafa þetta heljarlanga stýri, mála bensíntankinn í fánalitunum bandarísku og heilmikið króm.

Smíðuð voru fjögur svona hjól fyrir myndina, en þremur þeirra var stolið og hefur ekkert spurst til þeirra síðan. Eftir að tökur á myndinni voru afstaðnar afhenti Peter Fonda þeim sem viðhaldið hafði því meðan á tökum stóð, Dan nokkrum Haggerty. Hann átti það heillengi og hélt því vel við en á endanum fékk það pláss á Motorcycle Museum í Iowa fylki. Það var svo Michael Eisenberg sem keypti hjólið og hefur nú ákveðið að selja það hæstbjóðanda.