Mikið af bleikju í Steinsmýrarvötnum og birtingurinn mættur

Steinsmýrarvötn virðast vera komin í gang á hárréttum tíma en holl sem var þar um liðna helgi gerði fína veiði.

Veiðimenn sem veiddu Steinsmýrarvötnin liðna helgi veiddu vel af bleikju og náðu líka í nokkra sjóbirtinga en þetta er tíminn þar sem hann byrjar að ganga inná vatnasvæðið.  Það var ekki mikil ástundun á bak við góðar veiðitölur sem segir meira til um magnið af fiski sem virðist vera til staðar á svæðinu.  Bleikjurnar voru heilt yfir vænar og vel haldnar og sama mátti segja um sjobirtinginn en hlutfall hans eykst núna dag frá segi með auknum göngum.  Það var heldur einsleitt agnið sem bleikjan vildi taka en Bleikur Dýrbítur virtist vera það sem bleikjan vildi helst og skal engan undra því flugan sú er mjög gjöful á bleikju við flestar aðstæður þá sérstaklega sjógengna.  Nokkuð er laust af stöngum á næstunni þegar besti tíminn fer í gang en lausar stangir má finna á söluvef SVFR.