Fín veiði í Úlfljótsvatni

Bleikjan á Þingvöllum er komin í hrygningarbúning og safnast saman á grynningum til að hrygna og eins og við höfum greint frá er það oft mikið sjónarspil.

Veiðin hefur heldur dottið niður í Þingvallavatni af þessum sökum og þeir sem á annað borð hafa veitt ágætlega í vatninu sleppa bleikjunni yfirleitt því hún er ekki góður matfiskur á þessum tíma.  Það sést vel þegar kíkt er í fiska sem veiðast því þeir eru næstum því án undantekninga með galtómann maga.

Nágrannavatnið, Úlfljótsvatn hefur aftur á móti verið að gefa mjög fína veiði síðustu daga og er bleikjan búin að vera í feyknatökustuði.  Margar vænar hafa verið að koma á land þó að algengasta stærðin sé 1-2 pund er oft um helmingur af aflanum 3-4 punda bleikja.  Inná milli koma svo stöku urriðar og geta þeir líka verið rígvænir.  Hjón sem voru við veiðar fyrir fáum dögum síðan tóku tvö rígvæna urriða á spún og voru þeir á að giska um 10-12 pund en þeir voru mjög áþekkir að stærð.  Veiðimaður sem var við veiðistaðinn Áll gerði líka góða veiði í fyrradag þegar hann náði 15 bleikjum á skömmum tíma við kjöraðstæður eins og hann sagði sjálfur en þegar vindáttinn breyttist datt öll taka niður.  Bleikjan í Úlfljótsvatni var meira og minna að taka litlar smápúpur og var full af æti.  Það er því ennþá hægt að gera góða bleikjuveiði í nágrenni borgarinnar þessa dagana.