Bílar

Toyota uppfærir vélaframboðið

Finnur Thorlacius skrifar
Toyota Yaris
Toyota Yaris
Toyota hefur ekki endurnýjað framboð sitt á vélum af jafn miklum krafti og Mazda, Nissan og Honda á síðustu árum. Toyota hefur þess í stað lagt áherslu á tvinnbíla (Hybrid) og lagt lítið fé til þróunar á hefðbundnum brunavélum sínum. Það er að fara að breytast og það hratt.

Toyota ætlar að kynna 14 nýjar vélar á næstu 12 mánuðum og mun fleiri koma svo í kjölfarið. Þessar nýju vélar eru allt að 30% eyðslugrennri en þær vélar sem þær leysa af hólmi og eru hannaðar á þann veg að margir íhlutir í þær eru 50% ódýrari en í forverum þeirra.

Með því að spara í íhlutum getur Toyota bætt t.d. við forþjöppu eða beinni innspýtingu án þess að verð vélanna hækki og er sú hugsun gegnumgangandi í þessum umskiptum, þ.e. spara í framleiðslu íhluta til að hægt sé að eyða meira í að bæta afl eða minnka eyðslu þeirra.

Toyota hefur verið að dragast afturúr öðrum japönskum bílaframleiðendum hvað varðar lækkun í eyðslu bílaflota síns og hefur eyðsla Nissan-, Honda- og Mazda-bíla farið talsvert hraðar lækkandi á undanförnum árum en í bílum Toyota. Þessu ætlar Toyota að breyta og stefnir að því að taka aftur forystuna hvað varðar sparneytni.

Þessi mikla umbylting á vélarflota Toyota þar sem hver einasta vél verður endurnýjuð mun að sögn Toyota duga til næstu 10-15 ára.

Mest lesið




×

Mest lesið