Fyrsti Unimog af nýrri kynslóð

Hinn ódrepandi Unimog frá Mercedes Benz hefur nú gengið í endurnýjun lífdaga og er kominn fram að nýrri kynslóð. Fyrsti bíllinn rúllaði af færibandinu í gær í Þýskalandi.

Sem fyrr er bíllinn mikill vinnuþjarkur og kemst hvert sem hann vill, en sagt hefur verið um Unimog að enginn bíll hafi aðra eins getu til erfiðra ferða. Hann hefur til dæmis 120 cm vaðgetu, getur klifrað upp 45 gráðu halla og öxlarnir geta hallað um 30 gráður, en áfram fer hann samt.

Þessi bíll var upphaflega smíðaður fyrir hernaðaraðgerðir, en hann hefur orðið vinsæll um allan heim sem frábært ferðatæki og auk þess selst hann vel sem atvinnubíll, t.d. við snjómokstur og slökkvistörf, eða fyrir allar vinnuaðstæður þar sem erfitt er að komast.

Nýr Unimog mun fást í 10 mismunandi gerðum og verður með marga vélarkosti, frá 156 til 354 hestöfl. Í nýjum Unimog vekur athygli að framljósin eru nú í stuðara bílsins og lítið á þeim ber, eins og sést á meðfylgjandi mynd.

Landsnet festi kaup hérlendis á nýjum Unimog hjá Öskju og fékk hann afhentan um síðustu áramót og annar nýr bíll er í pöntun hjá Öskju. Það er því ekki bara úti í hinum stóra heimi sem markaður er fyrir þenna ótrúlega vinnuþjark.