1.965 nýir bílar í júní

Sala á nýjum fólksbílum frá 1. til 30. júní jókst um 33,9% en nýskráðir  fólksbílar á þessu tímabili eru 1.965 stk. á móti 1.468 í sama mánuði 2013. Er það aukning um 497 bíla.

Samtals hafa verið skráðir 6.377 fólksbílar á fyrstu sex mánuðum ársins og er það 31,9% aukning frá fyrra ári. Til samanburðar þá voru nýskráðir fólksbílar allt  árið 2009 aðeins 2.020 stk.

Salan nýrra bíla hefur verið mjög góð það sem af er ári sem og sala notaðra bíla. Samkvæmt bílasölum innan Bílgreinasambandsins vantar nýlega bíla á söluskrá en það skýrist fyrst og fremst af lítilli sölu nýrra bíla á árunum eftir bankahrun. 

„Aukningin í bílasölu er að miklu leiti í sölu til einstaklinga og fyrirtækja og reiknum við með áframhaldandi vexti í nýskráningum enda var endurnýjunarþörfin orðin brýn. Svo eðlileg endurnýjun eigi sér stað á bílaflota landsmanna þarf að nýskrá á bilinu 12-14þús fólksbíla á ári“, segir  Özur Lárusson framkvæmdastjóri Bílgreinasambandsins.