Nýr Þjóðhátíðarsmellur frá Kalla Bjarna

Karl Bjarni Guðmundsson, betur þekktur sem Kalli Bjarni, frumflutti nýjan sumarslagara á FM957 í morgun.

Kalli sigraði í fyrstu seríunna af Idol stjörnuleit sem sýnd var á Stöð 2 á árunum 2003 til 2004 en lítið hefur sést til hans í tónlistinni síðustu ár.

Nýja lagið, sem gengur undir nafninu Lundi, landi, lopapeysa, syngur hann með kærustu sinni Brynhildi og er lagið sannkallaður Þjóðhátíðarsmellur.

„Maður lokar augunum og maður er mættur á Þjóðhátíð,“ segir Kalli.

Lagið var samið í febrúar í fyrra en Brynhildur hefur ekkert fengist við tónlist til þessa. Kalli uppgötvaði hins vegar að hún gæti sungið þegar þau voru að skamma krakkana sína einn daginn eins og má heyra í hljóðbroti sem fylgir fréttinni.