Laxinn gengin upp á svæði II og III í Blöndu

Veiðin á svæði I í Blöndu er búin að vera mjög fín í sumar og veiðimenn voru þess vegna spenntir að sjá hvenær laxinn mætti á efri svæðin.

Samkvæmt fréttum frá leigutakanum Lax-Á er laxinn mættur bæði á svæði II og III.  Það er þess vegna alls ekki ósennilegt að lax sé kominn á IV líka.  Gunnar Másson var við veiðar á efri svæðunum og setti í 6 laxa en landaði þremur sem voru allt vænir tveggja ára laxar allt að 92 sm langir.  Svæði II hefur verið lítið stundað en engu að síður er það eitt fallegasta svæðið í ánni.  Þarna eru fallegar breiður og ljúfir strengir sem allir geta haldið laxi.  Það sem helst hefur dregið úr áhuga veiðimanna er hvað svæðið er stórt og ekki alltaf vel merkt en hjá Lax-Á má fá upplýsingar um helstu staði og aðkomu að þeim.  Einnig skrifaði Steini Hafþórs leiðsögumaður flotta lýsingu sem líklega er hægt að fá hjá Lax-Á.  Svæði III hefur verið vinsælla og sum árin gefið mjög góða veiði, eins á svæði IV.  Eitthvað er af lausum dögum á svæðunum en veiðin þar í sumar gæti litið mjög vel út miðað við flotta veiði á svæði I.