4 laxar á land við opnun Grímsár

Veiði hófst í Grímsá í gær við frekar erfiðar aðstæður og mikla vatnavexti en þrátt fyrir það komu fjórir laxar á land.

Allir laxarnir sem veiddust voru vænir tveggja ára laxar í góðum holdum en eitthvað meira sást af laxi sem var erfitt að fá upp í flugurnar.  Áin hefur verið vatnsmikil og svolítið grænskoluð eins og aðrar ár í nágrenninu sökum mikilla rigninga og hefur það gert veiðimönnum erfitt fyrir.  Sem dæmi um vatnavexti í ánni þá brast garður við Þingnesstrengi en það hefur ekki gert á þessum árstíma áður.  Ekkert hefur orðið vart við smálax frekar en í öðrum ám sem er ekkert sérstaklega óeðlilegt miðað við árstíma eða aðstæður en þegar árnar bólgna mikið bíða smálaxagöngurnar oft eftir því að vatnið sjatni áður en þær ganga upp í árnar.  Næsti straumur er 28. júní og dagarnir á undan á vikan á eftir gefa oft forsmekkinn af því hvernig sumarið kemur til með að þróast en miðað við seiðatalningar í ám á þessu svæði eru öll teikn a lofti um að ágætt meðalsumar sé í vændum.