Framarar fá efnilega örvhenta skyttu frá Gróttu

Örvhenta skyttan, Ólafur Ægir Ólafsson,  hefur gert tveggja ára samning við Handknattleiksdeild Fram en þetta kemur fram í fréttatilkynningu frá félaginu.

Ólafur Ægir Ólafsson er 18 ára og uppalinn hjá Gróttu á Seltjarnarnesi. Hann hefur  alla sína tíð leikið með Gróttu og verið með meistaraflokki félagsins undanfarin fjögur ár. Hann skoraði 79 mörk í 18 leikjum í 1. deildinni í vetur.

Ólafur Ægir leikur í stöðu hægri skyttu en hann er jafnframt liðtækur hornamaður. Þrátt fyrir ungan aldur er Ólafur Ægir afar öflugur leikmaður sem hefur leikið með öllum yngri landsliðum Íslands og nú síðast með U-20 ára landsliðinu.   

„Ég býð Ólaf Ægi hjartanlega velkominn í hópinn. Hann passar vel inn í það starf sem framundan er hjá okkur í Safamýrinni. Ég hef mikla trú á honum sem leikmanni og tel að hann geti bæði styrkt liðið og vaxið sem leikmaður hjá FRAM," er haft eftir Guðlaugi Arnarssyni, þjálfari meistaraflokks FRAM, í fréttatilkynningu frá félaginu.