Kynningarklippa frá Agent Fresco

„Við vildum leyfa fólki að fá smá tilfinningu fyrir því hvað sé í gangi í stúdíóinu hjá okkur,“ segir Arnór Dan Arnarson, söngvari hljómsveitarinnar Agent Fresco en sveitin sendi í dag frá sér kynningarklippu fyrir væntanlega smáskífu, sem ber nafnið Dark Water.

Hljómsveitin hefur undanfarið unnið af miklu kappi að nýrri plötu, en fyrsta smáskífulagið af plötunni er væntanlegt í byrjun maí.

Á morgun hefjast tökur á nýju myndbandi við lagið Dark Water en Dóri Andrésson og Marino Thorlacius leikstýra og taka upp myndbandið. Þeir vinna einnig við að myndskreyta og setja upp plötuumslagið. „Við höfum alveg frá fyrsta degi einbeitt okkur að því að túlka textana og „conceptið“ myndrænt og ég hlakka mikið til þess að sjá afraksturinn eftir þessa miklu vinnu.“ bætir Arnór Dan við.