Woodkid kafar í Silfru

Woodkid, sem er væntanlegur til landsins á tónlistahátíðina Secret Solstice, er mikill Íslandsvinur og hefur komið hingað í heimsókn í tvígang.

Samkvæmt tónleikahöldurunum hefur Woodkid mikið dálæti af landinu og hlakkar mikið til að spila hér í sumar.

Síðast þegar listamaðurinn var hér á landi kafaði hann meðal annars í Silfru á Þingvöllum og ætlar hann sér að endurtaka leikinn í ár.

Woodkid er leikstjóri, grafískur hönnuður og tónlistarmaður. Hann hefur leikstýrt myndböndum fyrir Kate Perry, Lana Del Ray og var sköpunar leikstjóri fyrir Pharrel Williams í sérstakri útgáfu af lagi hans Happy en myndbandið er 24 klukkustundir að lengd.

Fjöldi listamanna hefur boðað komu sína hingað til lands en meðal þeirra tónlistarmanna sem koma eru Massive Attack og Woodkid.

Tónlistahátíðin fer fram í Laugardalnum frá 20. - 22. júní í sumar.