Sendibíll ársins 2014 frumsýndur í Brimborg

Brimborg frumsýnir Ford Transit Connect, sendibíl ársins 2014, á morgun, laugardag frá kl. 12 til 16. Ford er fyrsti framleiðandinn sem hefur hlotið þessi verðlaun tvö ár í röð.

Ford Transit Connect er nýr bíll frá grunni, með nýjan undirvagn, nýjar vélar, nýtt útlit og innanrými. Bíllinn er fáanlegur með sparneytinni 1,6TDCi dísilvél með Start-Stop spartækni en allar dísilvélarnar uppfylla þau skilyrði sem þarf til að fá frítt í stæði í miðbæ Reykjavíkur í 90 mínútur í senn.

Nýr Ford Transit Connect er einnig fáanlegur með EcoBoost bensínvél sem valin hefur verið vél ársins tvö ár í röð. Bílinn má einnig fá sjálfskiptan með 1,6 lítra og 150 hestafla bensínvél.  Hann er í boði í tveimur lengdum og þriggja manna með hliðarhurðum beggja vegna.

Hann er búinn SYNC samskiptakerfinu og með upphitanlega framrúðu.  Í styttri gerð bílsins er hægt að flytja hluti sem eru 3 metrar að lengd og í þeirri lengri 3,4 metrar. Active City Stop búnaður minnkar líkur á árekstri á litlum hraða.

Ford Transit Connect með bensínvél kostar frá 2.382.470 kr. án vsk. og með dísilvél frá 2.589.641 kr. án VSK.

Til viðbótar við frumsýninguna á laugardaginn er áhugasömum boðið að kíkja í morgunkaffi föstudaginn 28. mars og mánudaginn 31. mars frá kl. 8. Hörður Guðjónsson mun taka á móti gestum og fræða áhugasama um kosti Ford Transit Connect.