Þetta er framlag Bretlands í Eurovision

Hin 26 ára Molly Smitten-Downes verður fulltrúi Bretlands í Eurovision-keppninni í Kaupmannahöfn í maí með lagið Children of the Universe.

Molly er frá Leicestershire og var beðin um að semja og flytja lagið í keppninni.

Molly hefur verið að syngja og semja lög síðan hún var tíu ára og hefur notið talsverðar velgengni í tónlistarbransanum uppá síðkastið.

Hún hefur unnið til verðlauna í heimalandi sínu og hitað upp fyrir tónlistarmenn á borð við Jake Bugg og Tinie Tempah.

Bretar binda vonir við það að Molly gangi betur en síðustu söngvurum sem þeir hafa sent til keppni.

Síðustu ár hafa þeir stundað það að senda söngvara sem áttu miklum vinsældum að fagna á árum áður en það dugði þó ekki til árangurs þegar á stóra sviðið var komið. Þannig lenti Bonnie Tyler í 19. sæti, strákasveitin Blue í 11. sæti og Engelbert Humperdinck í 25. sæti.