Outkast snýr aftur

Hljómsveitin Outkast kemur fram á yfir 40 tónleikum víðsvegar um heiminn á árinu. Þeir hefja leika á Coachella-hátíðinni í apríl. Þetta tilkynnti sveitin á samfélagsmiðlunum fyrir skömmu.

„Ég hlakka mikið til að stíga á svið með vini mínum og þakka ég öllum aðdáendum mínum, þetta er fyrir ykkur," sagði Big Boi annar af forsprökkum sveitarinnar. Þá sagðist hinn forsprakkinn, André 3000 vera mjög þakklátur fyrir að hafa verið hluti af sveitinni og bætti við; „Hugsið ykkur, okkur langaði bara að rappa."

Outkast gaf út sína fyrstu plötu sem ber titilinn Southernplayalisticadillacmuzik út í apríl árið 1994 og nálgast hún því tuttugu ára afmælið sitt. Sveitin hefur gefið út sex plötur og unnið til fjölda verðlauna. Þekktustu lög sveitarinnar eru líklega lögin Hey Ya! og Ms. Jackson.