John Paul Jones úr Led Zeppelin stofnar nýja sveit

John Paul Jones sem er best þekktur sem bassaleikari Led Zeppelin hefur stofnað nýja hljómsveit sem hann kýs að kalla Minibus Pimps. Hana stofnaði hann ásamt norska tónlistarmanninum Helge Sten, sem er líklega betur þekktur undir listamannsnafninu Deathprod.

Nafn sveitarinnar er dregið úr lagi sveitarinnar Beijing Sound Unit en þeir félagar fundu það á plötunni The Sonic Avant Garde, sem inniheldur kínverska tilraunatónlist.

Þeir stefna á að gefa út sína fyrstu plötu, Close to Ground þann 3. mars næstkomandi. Um er að ræða þunga raftónlist sem ætti að koma mörgum hlustandanum á óvart.

Jones var síðast í miklu sviðsljósi þegar hann lék með ofurhljómsveitinni Them Crooked Vultures sem skipuð var ásamt Jones, þeim Dave Grohl úr Foo Fighters og Nirvana, og Josh Homme úr Queens of the Stone Age.