Ný síða um fluguhnýtingar

Það er mikið hnýtt af flugum þessa dagana enda ekki ýkja langur tími í að næsta veiðitímabil hefjist eða rétt um tveir og hálfur mánuður.

Veiðimenn stytta sér stundir þangað til við að hnýta fyrir komandi átök og leita sér gjarnan hugmynda, uppskrifta og góðra ráða á netinu.  Veiðibúðin Vesturröst opnaði nýlega heimasíðu tileinkaða fluguhnýtingum og þeir félagar eru sveittir þessa dagana að henda inn efni, uppskriftum og fleiri ráðum handa þeim sem sitja við hnýtingar.  Síðuna er að finna á www.fluguhnytingar.is

Þegar ég hef spurt veiðifélaga mína að því hvað er helst verið að hnýta þá sitja flestir þeirra yfir silungaflugum enda fer maður líklegast hraðast í gegnum þær í boxinu svo það er gott að eiga smá lagar.  Þær sem þeir hafa verið að hnýta í bunkum eru flugur eins og Peacock, Killer, Frisco, Mobuto, Taylor og Héraeyra.  Þetta eru flugur sem ganga í öll vötn og mest eru þeir að hnýta í stæðrum 16-10, bæði með og án kúluhausa.  Það er afskaplega gaman að hnýta sínar eigin flugur og finna nýjar útgáfur af uppáhaldsflugunum og sjá hvernig það gengur í silunginn í vor.