Rokk & Ról Breka skartgripir

Jónas Breki Magnússon gullsmiður hannar "Rokk og ról“-skartgripi í Danmörku og selur meðal annars í versluninni Rhodium.

Við héldum að við gætum sigrað heiminn ein í fyrra en það var ekki að virka. Ég vil gera allt hundrað prósent svo ég ætlaði bara að gera allt sjálfur en ég er bara gullsmiður og hönnuður,“ segir Jónas Breki Magnússon.

Jónas Breki hefur búið í Danmörku í tæplega tíu ár ásamt eiginkonu sinni, Guðrúnu (Gúrý) Finnbogadóttur. Undanfarin ár hafa þau starfað saman að skartgripalínunum Breki og Zero6, en Gúrý er einnig fatahönnuður. Árið 2010 fluttu hjónakornin til Víetnams en þar starfaði Jónas Breki fyrir danska skartgripahönnuðinn Julie Saundlau. Eftir rúmlega árs búsetu í Asíu ákvað hann að stíga skrefið og verða sjálfstæður með eigin línu. Tvisvar hefur hann kynnt skartið á Copenhagen Fashion Week ásamt því að Gúrý hefur kynnt fatalínuna sína, Gúrý. 

Breki segir að nú hafi áherslurnar breyst til muna þar sem þau leggi meiri áherslu á skartið. „Við erum bestu vinir og erum búin að vera saman í ellefu ár svo það virkar bara að vinna saman,“ segir hann þegar hann er spurður út í samstarfið með eiginkonunni.

Línuna segir hann vera svokallaða „street fashion“ sem þó er unnin úr ekta gulli, silfri og eðalsteinum. „Það er ekkert óekta í hönnun Breka, þetta eru bara Rokk og ról-skartgripir sem henta fyrir bæði kynin. Mig var búið að dreyma um að fá hina dönsku Anne Lindfjeld sem módel síðan ég sá hana fyrst því hún hefur allt til brunns að bera sem lýsir skartinu. Ég sendi henni skilaboð á Facebook í sumar og spurði hana og hún sló til,“ útskýrir hann og bætir við. „Það er ekki endilega erfiðara að ná í fræga liðið.“

Hjónin stefna á að koma til Íslands um jólin og jafnvel halda sýningu með nýju línunni. Breka-skartið fæst í versluninni Rhodium í Kringlunni. Hægt er að skoða línuna nánar á brekidesign.com



Ljósmyndari Hildur María Valgarðsdóttir

Fyrirsæta Anne Lindfjeld

Grafískur Hönnuður Sverrir Brynjólfsson

Koloristi Daði Knee

Stílisti Gúrý