Íslenskir hönnuðir taka yfir Hörpu

Árið 2009 ákváðu fjórir fatahönnuðir að stofna milliliðalausa verslun frá hönnuði til neytandans og skapa vettvang fyrir nýútskrifaða hönnuði og hönnuði með smærri vörulínur.

Farandsverslunin, PopUp verzlun, varð að veruleika en verslunin poppar upp í tilfallandi húsnæðum þegar þeim hentar.

„Við poppum upp tvisvar til þrisvar á ári í kringum hönnunarviðburði. Þetta er í fjórða skipti sem við höldum hönnunarmarkaðinn fyrir jólin,“ segir Þórey Björk Halldórsdóttir skipuleggjandi jólamarkaðarins í Hörpu. Hann er haldinn í samstarfi við Epal og verða til sölu hönnunarvörur frá yfir 40 hönnuðum.

Jólamarkaður PopUp verzlunar hefur verið vinsæl síðustu ár og er markaðurinn einstakt tækifæri fyrir fagurkera á öllum aldri til að koma kynna sér nýjungar í íslenskri hönnun og gera góð kaup fyrir jólin.

„Samsetning hönnuða er fjölbreytt á hverju ári og í þetta sinn erum við með fersk vörumerki sem ég hef ekki séð áður, segir Þórey Björk glöð í bragði.

Boðið verður upp á tískuvöru, skartgripi, heimilisvöru, leikföng, barnaföt, jólakort og margt fleira. PopUp verzlunin er aldrei með sama sniði og mótar sig að hverjum stað, hverju sinni með sameiginlegan ávinning hönnuða að leiðarljósi.

Markaðurinn er opinn helgarnar 30. nóvember til 1. desember og 7.  til 8. desember. Opnunartími verður frá klukkan 12 til 18 báðar helgarnar.