Í fyrsta sinn í Eldborg

„Þetta er í fyrsta skipti sem hún kemur fram í Eldborgarsalnum í Hörpu,“ segir tónleikahaldarinn Kári Sturluson en Emilíana Torrini kemur fram á tvennum tónleikum í Eldborg í tilefni af nýútkominni plötu hennar sem ber nafnið Tookah. Tónleikarnir fara fram þann 6. desember næstkomandi.

„Miðasalan hófst í gær og gengur hún mjög vel,“ bætir Kári við.

Þetta eru fyrstu formlegu tónleikar Emilíönu síðan árið 2010, en þá hélt hún þrenna tónleika í Háskólabíói. Hún kom þó fram á Iceland Airwaves-hátíðinni fyrir skömmu við góðar undirtektir.

„Hún setti saman hljómsveit sem er með henni á tónleikaferðalagi um Evrópu þessa stundina en fyrstu tónleikar hennar með því bandi voru á Airwaves.“

Tookah kom út 9. september og hefur hlotið frábærar viðtökur. Fyrsta útvarpslagið af plötunni, Speed of Dark hefur til að mynda fallið afar vel í kramið hjá hlustendum landsins.