Safnar fyrir pólitískri rappplötu

Rapparinn Úlfur Kolka er að safna fyrir sólóplötu sinni Borgaraleg óhlýðni á vefsíðunni karolinafund.com.

Hér fer söfnunin fram.

Að sögn Úlfs verður þetta fyrsta pólitíska rappplata Íslandssögunnar en hún verður einnig hans fyrsta á íslensku. „Fullt af röppurum hafa gert pólitísk lög áður en ekki heilar rappplötur,“ segir hann og bætir við að um þemaplötu sé að ræða.

„Ég er að tala um hvernig er að tilheyra lágstétt á Íslandi og ég er með lag um Helga Hóseasson og hitt og þetta. Það er svolítið af anarkismahugmyndum hjá mér.“ Útgáfudagur er áætlaður í janúar, stafrænt og á vínyl.

Úlfur, sem er 32 ára, var áður forsprakki Kritikal Mazz, þar sem Ágústa Eva Erlendsdóttir var einn af meðlimum. Sveitin gaf út plötu árið 2002 hjá Smekkleysu og fékk hún tónlistarverðlaun Radio X og Undirtóna sem hiphop-plata ársins.

Eftir að Úlfur lauk námi í grafískri hönnun árið 2008 samdi hann lagið Til hvers að kjósa?, sem fjallaði um eftirmál búsáhaldabyltingarinnar. Eftir það varð ekki aftur snúið og núna er platan að verða að veruleika.