Engar málamiðlanir

Sænski elektródúettinn The Knife gefur út sína fyrstu plötu í sjö ár, Shaking the Habitual, eftir helgi. Tónlistaráhugamenn hafa margir hverjir beðið hennar með mikilli eftirvæntingu, enda hlaut sú síðasta, Silent Shout, frábæra dóma og vefsíðan Pitchfork setti hana í efsta sæti yfir plötur ársins 2006.

The Knife var stofnuð í Gautaborg árið 1999 og er skipuð systkinunum Karin Dreijer Andersson og Olof Dreijer. Hljómsveitin vakti fyrst alþjóðlega athygli eftir að José González bjó til eigin útgáfu af lagi þeirra Heartbeats og setti á plötu sína Veneer árið 2003. Ábreiðan var notuð í auglýsingu frá Sony. Þrátt fyrir að vera á móti alls kyns auglýsingamennsku réttlættu systkinin sölu lagsins með því að þau þurftu á upphæðinni að halda til að smíða sitt eigið hljóðver. Núna reka þau sitt eigið útgáfufyrirtæki, Rabid Records.

Karin og Olof eru feimin með afbrigðum og spiluðu ekki opinberlega á tónleikum fyrr en 2006 til að kynna Silent Shout. Fram að því hafði þeim fundist erfitt að koma rafrænni tónlistinni til skila á áhugaverðan hátt uppi á sviði. Systkinin koma yfirhöfuð sjaldan fram opinberlega og á flestum kynningarljósmyndum sínum eru þau með grímu fyrir andlitunum. The Knife hefur unnið fjölda sænskra tónlistarverðlauna en aldrei mætt til að veita þeim viðtöku.

Auk fjögurra hljómplata The Knife hafa systkinin gefið út hvort í sínu lagi. Karin gaf árið 2009 út sólóplötu sem Fever Ray og Olof bjó til nokkrar EP-plötur um svipað leyti undir nafninu Oni Ahyun.

Fyrsta smáskífulag Shaking the Habitual var hið níu mínútna langa, myrka og taktfasta Full of Fire. Yfirbragðið á smáskífulagi númer tvö, A Tooth for an Eye, er öllu léttara. Dómar um plötuna hafa verið jákvæðir. Uncut gefur henni 9 af 10 í einkunn og Clash 8 af 10.

Gagnrýnandi BBC er einnig yfir sig hrifinn: „Plötur verða ekki meira ögrandi, grimmar og lausar við málamiðlanir eins og Shaking the Habitual," segir hann og bætir við að það muni taka langan tíma að melta hana. „Shaking the Habitual er öðruvísi en allt annað en það er erfitt að finna eitthvað eins svakalega hressandi."