Þórunn Antonía og Bjarni í Mínus í eina sæng

Söngkonan Þórunn Antonía Magnúsdóttir og Bjarni M Sigurðarson, fyrrverandi meðlimur í hljómsveitinni Mínus, leiða saman hesta sína á nýrri plötu sem er væntanleg stuttu eftir áramót.

„Við höfum verið að vinna saman að þessari plötu í nokkurn tíma og þetta er svona smá forskot á sæluna,“ segir Þórunn Antonía, en þau Bjarni halda tónleika á Loftinu í Austurstræti í kvöld klukkan níu þar sem þau koma til með að spila glænýtt efni.

„Við vorum að klára upptökur í dag á fyrsta laginu sem við ætlum að gefa út, með Halli Ingólfssyni, og það er væntanlegt í lok næstu viku,“ segir Þórunn Antonía jafnframt.

Þórunn Antonía hefur verið iðin við kolann undanfarin ár, en hún gaf meðal annars út smellinn Too Late sem vakti mikla athygli. Myndbandinu við lagið, sem fylgir hér að neðan, er leikstýrt af Ágústi Bent.