Metallica í upptökur á næsta ári

James Hetfield, söngvari Metallica, segir að hljómsveitin ætli að hefja upptökur á nýrri plötu snemma á næsta ári.

Fimm ár eru liðin frá því síðasta plata, Death Magnetic, kom út.

"Vonandi gerist þetta bráðum. Ég iða í skinninu. Við eigum fullt af efni en það tekur langan tíma að fara í gegnum það. Ég veit að við þurfum bara nokkur lög en þarna eru 800 "riff" sem við þurfum að fara í gegnum. Þetta er hálfgerð klikkun," sagði Hetfield í viðtali við The Oakland Press.

Metallica er í hvíld þessa dagana eftir að hafa unnið hörðum höndum að þrívíddarmyndinni Metallica: Through The Never, sem kom út 4. október.