1.000 Toyota bílar seldir á árinu

Í dag tóku hjónin Þórdís Dagbjört Gunnarsdóttir og Jóhann Guðmundsson við 1.000. og 1.001. Toyota bílunum sem afhentir eru á þessu ári. Þau tók við lyklunum að bronslitum RAV4 og dökkgráum Yaris úr hendi Úlfars Steindórssonar, forstjóra Toyota á Íslandi.

Þetta er fimmti og sjötti Toyotabíllinn sem hjónin Þórdís og Jóhann kaupa og þau tilheyra því stórum hópi tryggra Toyotaeigenda á landinu. Mörg dæmi er um heilu fjölskyldurnar þar sem aðeins eru keyptir Toyotabílar árum og áratugum saman en þó er heldur sjaldgæft ef ekki einsdæmi að hjón taki við tveimur Toyotum sama daginn.

RAV4 og Yaris eins og hjónin tóku við í dag eru mest seldu gerðirnar hjá Toyota það sem af er þessu ári. Ný kynslóð RAV4 var kynnt fyrr á árinu og hafa viðtökur verið mjög góðar. Bíllinn er lengri og betur búinn en eldri kynslóðir og hentar vel við íslenskar aðstæður. Ný kynslóð Yaris kom á markað á síðasta ári og var bíllinn þá í fyrsta sinn kynntur í Hybridútfærslu.