Brimborg frumsýnir 60-línuna

Á morgun, laugardag, milli kl. 12 og 16, mun Brimborg  frumsýna nýju Volvo 60 línuna. Um er að ræða Volvo XC60 sportjeppann og svo nábræðurna Volvo S60 og Volvo V60 sem er skutbíll.

Lúxus sportjeppinn Volvo XC60

Volvo XC60 hefur nú enn kraftalegra útlit en töluverðar breytingar voru gerðar á framenda og einnig minniháttar breytingar á afturenda. Ný hönnun er á sætum í allri Volvo 60 línunni. Jafnframt er nýtt digital umhverfi í mælaborði og nýtt efnisval innréttingar. DSTC stöðugleikastýrikerfið í Volvo XC60 leiðréttir mistök í akstri og CTC beygjuspólvörnin gerir ökumanni kleift að taka beygjur á meiri hraða, með aukinni mýkt og öruggar en áður. Þess má geta að veghæð Volvo XC60 eru heilir 23 cm undir lægsta punkt. Aftursætin í Volvo XC60 eru þrískipt (40/20/40) sem býður t.d. upp á fjölbreyttari og þægilegri flutningsmöguleika. Brekkuaðstoð (Hill Descent Control) er staðalbúnaður í Volvo XC60. Kerfið er virkjað með því að styðja á hnapp og heldur þá hallalæsingin bílnum á hægum hraða (10 km hraða að hámarki áfram og 6 km afturábak), sem getur verið afar þægilegt og stuðlað að auknu öryggi á leið niður bratta brekku þar sem ökumaður vill fara sérlega varlega.

Háþróuð samskiptatækni í allri Volvo 60 línunni

Sensus hljómkerfið er staðalbúnaður í allri Volvo 60 línunni. Kerfið býr yfir öflugum magnara, hágæða hátölurum og bluetooth þráðlausri tengingu fyrir síma og tónlist. Með uppfærslu í Multimedia hljómkerfi með 7 tommu skjá í miðjustokk er hægt að tengjast netinu og njóta þess sem nútímasamskiptatækni býður upp á. Með raddstýringu er einnig hægt stjórna aðgerðum hljómtækja og síma.

Jafnframt er hægt að nálgast forrit (app) í gsm símann þar sem ýmsar upplýsingar um bílinn eru aðgengilegar. Meðal annars hvort hann sé læstur eða hvort átt hafi verið við læsingar. Ef bílnum hefur verið stolið er hægt að hafa uppá honum í gegnum „Volvo on call“ kerfið. Þar er einnig hægt að forstilla vélahitara þannig að bíll er heitur þegar keyrt er af stað.

Verndar þig og þína

Líkt og í öðrum Volvo bifreiðum er mikill öryggisbúnaður í Volvo 60 línunni. Sex öryggispúðar tryggja að öryggi ökumanns og farþega er eins og best verður á kosið. Styrktarbitar úr hástyrktarstáli eru í hurðum og ISO-fix barnabílstólafestingar eru til staðar í aftursætum. DSTC stöðugleikastýrikerfi með spólvörn, ABS hemlakerfi, nálægðarskynjari í afturstuðara, háls og bakhnykksvörn í framsætum er einnig staðalbúnaður ásamt nýjasta öryggiskerfinu frá Volvo sem kallast City Safety.

Borgaröryggi (City Safety) er staðalbúnaður í allri Volvo 60 línunni

Margverðlaunaða öryggiskerfið City Safety er í raun sjálfvirk bremsa. Tilgangur kerfisins er að koma í veg fyrir ákeyrslur í umferð að allt að 50 km hraða. Kerfið fylgist með fjarlægð milli bílsins og næsta bíls (eða hindrun) fyrir framan og nauðhemlar ef ökumaður bregst ekki við mögulegri ákeyrslu. 

Markmið Volvo með City Safety er meðal annars að koma í veg fyrir hálsmeiðsl og aðra algenga áverka sökum aftanákeyrslna. Þess má geta að evrópsk tryggingafélög líta á City Safety öryggiskerfið sem bestu tækninýjungina þar sem markmiðið er að draga úr aftanákeyrslum í umferðinni.

Aukabúnaður sem eykur öryggi

Að auki býður Volvo uppá önnur öryggiskerfi, svo sem veglínuskynjara, BLIS myndavél á hliðarumferð og árekstrarvara. Þessi þrjú kerfi eru innifalin í Driver Support útfærslunni en einnig er hægt að fá hvert kerfi sem stakan búnað. City Safety kerfið virkar upp að 50 km hraða en árekstrarvarinn upp að 200 km hraða. Hann lætur ökumann vita um aðvífandi hættu með góðum fyrirvara bæði með ljósmerki og hljóði en ef ökumaður bregst ekki við því nauðhemlar bíllinn sjálfur og kemur þannig hugsanlega í veg fyrir ákeyrslu. Bakkmyndavél og bílastæðaaðstoð eru einnig fáanleg sem getur auðveldað akstur og aukið öryggi svo um munar.