Jay Z er ruglaður

Josh Homme úr rokksveitinni Queens of the Stone Age vandar rapparanum Jay Z ekki kveðjurnar í nýlegu viðtali við útvarpsstöðina CBC Radio 2.

Fyrir tveimur vikum spiluðu Queens of the Stone Age á hátíðinni Made In America sem Jay Z stóð fyrir í Fíladelfíu í Bandaríkjunum.

"Þessi náungi er ruglaður. Hann lætur öryggisverði sína leita á hljómsveitum sem eru á leiðinni á tónleikastaðinn," sagði Homme. Hann hótaði að hætta við að spila á hátíðinni eftir að öryggisverðirnir vildu fá að skoða ofan í töskuna hans. "Enginn hefur beðið um þetta áður. Þú átt ekki að leita á mínum mönnum. Þú átt bara að drulla þér í burtu."

Jay Z gaf Homme og félögum flösku af kampavíni og vildi láta taka mynd af þeim með flöskuna. "Ég hugsaði með mér: "Þetta er ekki gjöf, þetta er markaðstæki". Ég eyðilagði flöskuna vegna þess að mér fannst þetta mjög dónalegt."

Hann bætti við: "Fólk segir aldrei neitt slæmt um Jay Z, er það nokkuð?"