Útlitsbreytingar í Nissan Juke slá í gegn

Nissan Juke stendur sannarlega út úr fjöldanum fyrir óvenjulegt útlit sitt, en margir hafa greinilega áhuga á að gera hann enn sértakari útlits. Nissan kynnti heilmikið framboð af litaglöðum aukahlutum í bílinn í fyrra og gríðarvel hefur verið tekið í þessa nýjung.

Nissan bauð í fyrstu  11 mismunandi útfærslur og 8 mismunandi liti á þessum aukahlutum. Hlutirnir sem um ræðir eru 17 tommu álfelgur, vindskeið að aftan, litaglaðar hliðarplötur og umgjarðir utanum framljósin. Nissan hefur nú bætt við þremur nýjum litum og 18 tommu álfelgum sem fá má silfraðar, svartar eða metalgráar.

Fyrir innra byrði bílsins má einnig fá jafn litaglaðar innsettningar í mælaborð, hurðir bílanna, umgjörð um loftinntök og gólmottur í sömu litum og aukahlutina að utanverðu. Til að auðvelda kaupendum að sjá hvernig bílar þeirra muni líta út eftir breytingarnar hefur Nissan útbúið þrívíddarsýn á tölvuskjá þar sem þeir geta virt fyrir sér endanlegt útlit.