Fölsuðu eyðslutölur og voru reknir

Á annan tug starfsmanna Chevrolet voru reknir í kjölfar þess að þeir fölsuðu eyðslutölur Chevrolet Tavera jepplings sem seldur er í Indlandi. Meðal þeirra sem reknir voru er yfirmaður vélarsmíði General Motors fyrir allan heiminn, en hann hefur starfað hjá fyrirtækinu frá árinu 1969, eða í 44 ár.

Brot starfsmannanna töldust mjög alvarleg en þeir voru staðnir að því að svindla gróflega við prófunaraðferðir véla Chevrolet og gengu svo langt að skipta hreinlega á vélum við prófanirnar og setja afar sparneytnar 2,0 og 2,5 lítra vélar í stað miklu eyðslufrekari vél sem Tavera jepplingurinn er seldur með.

Starfsmennirnir áttu einnig við þyngd prófunarbílanna svo þeir sýndu lægri eyðslutölur. Þessi brot starfsmannanna varð til þess að framleiðsla og sala Tavera bílsins var hætt tímabundið og allir slíkir bílar sem framleiddir hafa verið sl. 8 ár innkallaðir. Þetta verður því Chevrolet afar dýrt.