Samaris heldur útgáfutónleika

Samaris heldur útgáfutónleika á Volta á fimmtudag til að fagna samnefndri plötu sinni.

Platan, sem inniheldur meðal annars stuttskífurnar Hljóma þú og Stofnar falla, er gefin út af 12 Tónum á Íslandi en af One Little Indian annars staðar í heiminum.

Á tónleikunum á fimmtudag verða lög af skífunni í bland við nýtt efni af væntanlegri breiðskífu. Þar koma einnig fram hljómsveitin Yagya og Dj Yamaho.

Samaris er skipuð þeim Áslaugu Rún Magnúsdóttur (klarinett), Jófríði Ákadóttur (söngur) og Þórði Kára Steinþórssyni (forritun). Sveitin vakti fyrst athygli með sigri á Músíktilraunum árið 2011 og skapaði sér strax sérstöðu með sveimkenndri tónlist sinni.

Þar var blandað saman framúrstefnulegum töktum við reikulan klarinettuleik og dulrænan söng Jófríðar, en allir textar sveitarinnar eru sóttir í klassískan ljóðbálk íslenskra skálda frá lokum 19. aldar til byrjunar 20. aldar - allt frá Steingrími Thorssteinssyni til Guðfinnu frá Hömrum.

Sveitin gaf sjálf út stuttskífuna Hljóma þú fyrir Iceland Airwaves árið 2011. Samaris endurtók leikinn árið seinna með annarri stuttskífu, Stofnar falla, en hún var að mestu leyti tekin upp í Sundlauginni ásamt þeimi Birgi Jóni Birgissyni og Gunnari Tynes (múm).

Þá voru fjölmörg plötufyrirtæki farin að sækjast eftir samstarfi við sveitina, en í byrjun árs skrifaði Samaris undir plötusamninga við 12 Tóna á Íslandi og One Little Indian í Bretlandi. 

Samnefnd skífa sveitarinnar er fyrsta afurð þessa samstarfs, en jafnframt er sveitin þessa daganna að leggja lokahönd á sína fyrstu breiðskífu í fullri lengd, í samvinnu við upptökustjórann og raftónlistarmanninn, Oculus.

Aðgangseyrir á tónleikana er 1.000 krónur, en fyrir 2.500 kr fæst eintak af hljómplötunni með aðgangi að tónleikunum.