Toyota ýjar að arftaka Supra

Takeschi Uchiyamada sem brátt verður stjórnarformaður Toyota hefur gefið til kynna að sportbíllinn sem Toyota er að vinna að í samstarfi við BMW verði arftaki Toyota Celica Supra bílsins. Hann færði fyrirtækinu góða ímynd sem framleiðandi góðra sportbíla, en Toyota hefur misst þá ímynd eftir að fyrirtækið hefur ekki boðið slíka bíla eftir að framleiðslu hans var hætt árið 1999.

Sú ímynd batnaði þó til muna eftir gott samstarf Toyota við Subaru við framleiðslu Toyota GT-86/Subaru BRZ bílsins. Nýi bíllinn á að vera líkari Celica Supra bílnum og aðgreinast verulega frá GT-86. Stærstu ákvarðanirnar um smíði þessa bíls verða teknar af verkfræðingum okkar sagði Uchiyamada.

Uchiyamada er frægastur sem faðir Prius Hybrid bílsins svo smíði þessa sportbíls er ansi langt frá sérsviði hans en hann gerir sér grein fyrir hversu miklvægt er fyrir Toyota að endurreisa ímynd sína á sviði sportbíla og gera merki Toyta spennandi aftur. Það ætti ekki að reynast þessu stærsta bílafyrirtæki heims svo erfitt með allt sitt fjármagn.