Enn einn nýr frá Audi

Það telst vart til tíðinda að Audi hugi að nýrri gerð bíls, en á undanförnum árum hefur þeim fjölgað mjög og á næstu árum mun sú þróun halda hressilega áfram. Síðustu fréttir eru af svokölluðum MPV (Multi Purpose Vehicle) bíl sem byggður yrði á grunni A3 bílsins en væri með tuttugu sentimetra lengra bil milli öxla. Bílar af þessari gerð hafa oft verið kallaðir strumpastrætóar því þeir þykja henta vel barnmörgum fjölskyldum.

Þessum nýja bíl yrði ætlað að keppa við Mercedes Benz B-Class og BMW Concept Active Tourer. Audi er ekkert að drolla við framleiðslu þessa bíls en hann á að verða í boði strax á næsta ári. Er það að vonum þar sem bíllinn verður að mestu byggður á A3 bílnum og þróunarvinna því lítil við framleiðslu hans.