Gumball 3000 keppnin hafin

Það byrjaði ekki vel hjá ökumanni þessa Lamborghini LP670-4, en hann hafði vart lagt af stað í hinni árlegu Gumball 3000 aksturskeppni er hann klessukeyrði bílinn. Keppnin þetta árið byrjaði í Kaupmannahöfn í gær, en eins og venjulega er ekin 3.000 mílna leið, eða um 4.800 kílómetrar. Keppnin endar í Mónakó, en komið er m.a. við í Stokkhólmi, Helsinki , Tallinn, Riga, Varsjá og Vín.

Aðeins 120 bílar komast í keppnina hverju sinni og eru flestir mjög öflugir sportbílar. Þrátt fyrir að Gumball sé kölluð aksturskeppni er ekki mikil alvara né keppnisskap sem einkennir hana. Það eru heldur engin verðlaun fyrir þann sem lýkur henni fyrst, heldur njóta ökumenn og farþegar fyrst og fremst leiðarinnar og akstursins.

Gumball 3000 var fyrst haldin árið 1999 og stofnandi keppninnar er Maximillion Cooper. Meðal þátttakenda í ár eru David Hasselhoff, brettagaurinn Tony Hawk og Formúlu 1 ökumaðurinn Kimi Raikkonen. Nokkrir Íslendingar hafa tekið þátt í Gumball 3000 á fyrri árum.