Fá hálfan milljarð í bætur

Urðu fyrir árás lögreglunnar sem tók bíl þeirra í misgripum fyrir flóttabíl morðingja.

Fyrir nokkrum vikum var hér greint frá herfilegum mistökum lögreglunnar í Los Angeles þar sem hún hóf skothríð á blásaklausar mæðgur á pallbíl. Þær voru snemma að morgni að bera út blöð þegar kúlnahríðin dundi á bíl þeirra, en lögreglan var á höttunum eftir morðingja einum sem var á flótta á ekkert ólíkum bíl.

Mæðgurnar voru reyndar á Toyota Tacoma en morðinginn á Nissan Titan pallbíl, svo það mætti aðeins uppfræða lögregluna í bílafræðum. Það hefði að minnsta kosti sparað ríkinu 4,2 milljónir dollara, en það er sú upphæð sem mæðgurnar fá í sinn vasa fyrir “ónæðið” af árásinni sem þær sluppu svo giftusamlega frá.

Þessi upphæð samsvarar 491 milljón króna, svo mæðgurnar ættu að eiga fyrir salti í grautinn í dágóðan tíma og jafnvel keypt sér bíl sem stendur meira út úr fjöldanum ef svo illa vill til að lögreglan uppfæri ekki þekkingu sína á bílum! Það er víst betra að vera lifandi þegar maður er orðinn ríkur.