Ford og GM smíða saman 9 og 10 gíra sjálfskiptingar

Hafa áður smíðað saman sjálfskiptingar í sparnaðarskyni.

Stóru amerísku bílaframleiðendurnir Ford og General Motors hafa snúið bökum saman og eru nú að smíða saman bæði 9 gíra og 10 gíra sjálskiptingar. Eiga þær að fara í bíla beggja fyrirtækjann af árgerð 2017. Ástæða þess að þau sameinast um smíðina er sá sparnaður sem af því hlýst í stað þess að gera það sitt í hvoru horni.

Níu gíra skiptingin mun fara í framhjóladrifna bíla en sú 10 gíra í afturhjóladrifna bíla. Þetta er reyndar ekki í fyrsta skipti sem fyrirtækin tvö sameinast um smíði skiptingar, en fyrir áratug síðan framleiddu þau saman 6 gíra skiptingu sem fór svo í framleiðslu árið 2006 og er í bílum eins og Ford Explorer og Chevrolet Traverse.

Nýju skiptingarnar tvær eiga að fara í mjög breiða línu bíla, allt frá smæstu bílum þeirra til stærstu jeppa og pallbíla. Ford og GM voru bæði orðin á eftir meðal bílaframleiðenda í framleiðslu fjölgíra skiptinga og því lá þeim á að gera betur og hvað er þá betra en taka höndum saman með mikið fjármagn að baki.

Chrysler mun brátt bjóða 9 gíra skiptingu í bílum sínum og Hyundai vinnur að 10 gíra skiptingu. GM heldur áfram að vinna að 8 gíra skiptingu sinni sjálfstætt og mun bjóða hana fyrr en þær sameiginlegu.