Fyrsta myndband Sísý Ey loksins frumsýnt

Vísir frumsýnir hér myndbandið við smellinn Ain´t Got Nobody með hljómsveitinni Sísý Ey. Lagið hefur verið að gera allt vitlaust síðustu vikurnar og er eitt það vinsælasta á landinu. Þetta fór meðal annars ekki fram hjá tónleikagestum Páskagleðinnar í Listasafni Íslands á laugardag. Sísý Ey steig þar síðust á svið og ætlaði allt um koll að keyra þegar upphafstónar Ain´t Got Nobody heyrðust úr hátölurunum. Ain't Got Nobody smáskífan kom út á iTunes og víðar í gær. Fjöldi hæfileikaríks fólks kom að gerð myndbandsins; leikstjóri þess er Guðrún Helga Sváfnisdóttir, klippari er Elisabet Ronalds, tökumaður Ólafur Örn Ólafsson, gaffer Eyjólfur Ásberg, Steinunn Þórðardóttir sá um förðun og Einar Bragi Rögnvaldsson um litgreiningu og masteringu. Carmen Jóhannsdóttir framleiddi. Í myndbandinu koma fram þeir Lárus Páll, Magnús Jónsson, Daníel Ágúst, Jón Atli og Margeir. Hægt er að fylgjast nánar með Sísý Ey hér á Facebook-síðu sveitarinnar.