Tilkynning frá Öskju vegna innköllunar Kia bíla

Á Íslandi eru 537 Kia bílar sem falla undir innköllunina.

Greint var frá í morgun hér á visir.is að Hyundai og Kia muni innkalla 1,6 milljón bíla sinna. Því vill Askja koma eftirfarandi á framfæri:

Kia Motors hefur tilkynnt um innköllun á ákveðnum gerðum Kia bifreiða, vegna mögulegrar bilunar í rofa tengdum hemlaljósum. Um er að ræða bifreiðar sem framleiddar voru á ákveðnu framleiðslutímabili, og er mestmegnis um að ræða bifreiðar framleiddar á árunum 2004 – 2010.

Alls verða innkallaðar um 126.000 bifreiðar í Evrópu, og af þeim eru 537 skráðar á Íslandi. Varahlutir vegna innköllunarinnar munu byrja að berast í maí og júní, og í framhaldi mun Bílaumboðið Askja kalla inn þær Kia bifreiðar sem um ræðir, þar sem skipt verður um umræddan rofa, án kostnaðar fyrir eigendur bifreiðanna. Um er að ræða sjálfviljuga innköllun Kia Motors og verða upplýsingar sendar Neytendastofu þegar þær liggja endanlega fyrir.