Kínverskir BMW og heita Zhi Nou

Verða seldir víðar en í Kína og líklega í Evrópu.

Ekkert lát er á fjárfestingu bílaframleiðenda í Kína og það nýjasta í þeim efnum er að BMW ætlar að leyfa kínverskum samstarfsaðila sínum, bílaframleiðandanum Brilliance, að smíða BMW bíla undir nafninu Zhi Nou.

Ekki liggur fyrir hvort það séu núverandi módel BMW eða eitthvað eldri. Fyrri getgátur voru uppi um smíði eldri gerðar 3-línu BMW sem ber framleiðslunúmerið E90, en nú þykir fullt eins líklegt að smíðaður verði X1 jepplingur eins og sést hér á myndinni.

Líklega verður fyrsti BMW bíllinn sem smíðaður verður af Brilliance sýndur á bílasýningunni í Shanghai seinna í þessum mánuði. Það sem er ef til vill athygliverðast er það að útflutningur á þessum bílum er ekki útilokaður og fullt eins horft til Evrópu sem annarra markaða. Því gæti Evrópubúum staðið til boða að kaupa kínverska BMW bíla sem væru vafalaust miklu ódýrari en þeir þýsku.

Skammt er síðan að Mercedes Benz greindi frá því að samstarfsaðili þeirra í Kína, BAIC Motor, smíði brátt bíla sem séu í raun af Benz gerð. Mercedes Benz á reyndar 12% hlutafjár í BAIC Motor.