Spila á tónlistarhátíðum í Genf og Vilnius

Rafdúettinn Stereo Hypnosis ásamt tónskáldinu Þorkatli Atlasyni leggja land undir fót um páskana til Sviss og Litháen. Þar munu þeir spila á tveimum stórum tónlistarhátíðum í Genf og Vilnius. Tónlistarhátíðin í Genf heitir Electron Festival og er þekkt sem ein af stærstu raftónlistarhátíðunum þar í bæ. Electron Festival fagnar einmitt tíu ára afmæli sínu nú í ár og eru listamennirnir sem troða þar upp ekki af verri endanum; LFO, Tiga, Atari Teenage Riot, Theo Parrish, Jimmy Edgar og Machinedrum. Stereo Hypnosis, sem er skipaður feðgunum Pan og Óskari Thorarensen, stígur þar á stokk á páskadag. Hátíðin í Vilnius heitir Jauna Muzika. Hún er ein af stærstu tónlistarhátíðum sem haldnar eru í Eystrasaltsríkjunum. Thorarensen-feðgar spiluðu áður á hátíðinni í Vilnius árið 2011. Þeir ætla nú að frumflytja nýtt tón- og myndverk sem var sérstaklega samið fyrir þessa tónleika. Þá er ný plata í smiðum hjá Stereo Hypnosis en hún mun koma út í desember. Í spilaranum hér fyrir ofan má hlusta á lag dúettsins Farmer In The Sky af þröngskífunni Glossolalia, sem kom út í fyrra.